Hvaða vörur má merkja?
Íslensk hráefni, matvörur og samsettar vörur
Merkið má nota til auðkenningar allra íslenskra matvælahráefna. Því má nota merkið á allar matvörur sem uppfylla skilyrði um íslenskan uppruna. Kjöt, egg, sjávarafurðir og mjólk skal í öllum tilfellum vera 100% íslenskt, líka í samsettum vörum. Allt að 25% innihalds í samsettum matvörum má vera innflutt.
Þetta þýðir í stuttu máli að meginhluti samsettrar matvöru er sannarlega íslensk, en svigrúm er gefið til að merkja vörur sem innihalda takmarkað magn innflutts hráefnis. Dæmi um slíkt er jógúrt með múslí og ferskjum, eða grillpylsa með broddkúmeni og hvítlauk.
Blóm, garðplöntur og grænmeti
Merkið má nota til að merkja grænmeti og plöntur ræktuð á Íslandi út frá fræjum, lauk og útsæði. Þetta á við um allt hrátt grænmeti líkt og tómata, gúrkur og paprikur. Einnig má merkja vörur sem innihalda skorið grænmeti blandað öðru, svo lengi sem varan inniheldur minnst 75% íslenska afurð samkvæmt skilyrðum vottunarinnar.
